Niederdeutsche Apokalypse HS M (nach Edition Christ 1910; Verszählung nach Psilander 1905)

	<1ra>
2117	[He sach] de hemel porten ope[nst]aen vile wide
	vnde sach vp einen blanken rosse einen man riden.
	De was truwe vn(de) warachtich,
2120	eme ne was nema(n) ghelyc.
	He vacht mit rechte in deme lande
	weder sine viande.
	Sine oughen waren flammen ghelyc,
	he droch eine crone herlyc,
2125	Cleider wit vnde goede;
	vnde was b[e]sprenget mit deme bloede.
	He was herlic vnde vrome,
	he was gheheten godes sone.
	Al hemelche here volghede hem to hant;
2130	ere ros vn(de) ere cleider waren blanc.
	He ret bevore en(de) to allen stunden;
	ein swert scarp ginc vte sinen munde.
	Dat ne was nicht vermeten,
	vppe sinen cleide was ghescreue(n),
2135	Dat he conig bouen alle conige were
	vnde here bouen allen heren.
	Got selue betekenet den de dar reet,
	dat blanke ros de cristenheit.
	Dar got sachte vppe ridet,
2140	also he des selighen herte bestridet. <1rb>
	Sin oughen w[ar]en na einer flammen g[heda]en,
	wan[te he] unsen danken mit den werken sut an.
	Al hemelsche here volghede eme mit witte(n) cleiden,
	dar he de lieuen sceidet vnde de leiden,
2145	In der stat to iosaphat,
	alse he seluen ghelouet hat.
	Dat sine cleider van bloede sin roet,
	dat is dat he wart ghemarteloet.
	De selue verschen wonden
2150	toghet he daer to stunden.
	Dat suert dat vte sine(n) munde ghet,
	dat is dat ordeel dar he mede slet
	Aller manlike na sinen werken;
	dat moghet gi wol merken!
2155	He is ein coning gheher
	vnde is dan daer ein recht richtere.
	Hir na sach ich einen engel staen in der su(n)nen,
	de riep mit groter stemme.
	He ladede de voghele dat se quamen,
2160	dar se wertscaf vernamen.
	Dar solden si eten beide ros vnde man,
	wante se weder got hadden ghedan. <1va>
	Do qua(m) daer ein dier vte de(m) mere
2165	mit [ei]nen michelen here.
	Se wolden striden weder godes holden
	de de wertscap besitten solden.
	Dat dier wart segheloes alto hant.
	wo uaste men do dat dier bant
2170	Vnde sine sellen.
	men sande se dar men se solde quellen
	An den vure vnde an den sueuele
	vnde an maniger hande ouele.
	Somelike worde[n] se doet ghesleghen;
2175	se verloren dat lyf alse bose saghe(n).
	De engel de in der su(n)nen steit,
	dat is de p(re)diket van der gotheit
	Vn(de) de vns ladet vlitelike
	to sine(n) hemelrike,
2180	Beide dach vnde nacht
	to den <sic> lammes wertscap.
	De dar comet na de(m) lesten daghe,
	also vns de scrift saghet.
	De hemelischen voghele sin de selige(n),
2185	de mit eren goeden werken na gode vleghet,
	Dar si de vrowede solen besitte(n).
	dat se ros vnde man solen eten,
	Dat is de wrake de se solen sien,
	do godes viande sal bescen. <1vb>
2190	Godes torn sal se versl[uk]en;
	se ne moeten der vrowede nicht ghebruken.
	Dat is iv ghesaghet oc er:
	anti(christus) is dat dier,
	De sich weder got ghesettet in den lesten stunden;
2195	de wert gheua(n)gen vnde ghebunden
	Van gode vnsen heren
	vnde wert mit siner sellescaf verdomet iummer mere.
	Hir na sach ich comen eine(n) engel alto hant;
	de vorde den slutel des afgrundes in der hant
2200	Vnde eine rekenten de was groet.
	de nam den alden draken oc
	Vnde bant ten in der seluer stunt
	in der diepen hellen grunt
	Vnde besloet ene dar duse(n)t iaer,
2205	dat he dat volc ne verledede nicht meer.
	Vnde alse de sun vergangen,
	so lost men en doch nicht lange.
	Dar na sach ich sitten vppe stoelen de tuelf holde(n),
	de al mancunne ordelen solten,
2210	Vnde al de martelere
	de duruen dor god vnsen heren,
	De anderes waren doch
	de waren al sunder <2ra>
	[Ere stra]ten sin van roden golde
2535	vnde sin manich volde.
	Se sin lutter also ein glas.
	neghein bedehus dar inne was;
	Got is selue dat bedehus,
	iohan saghet uns aldus.
2540	Dar ne scinet noch de su(n)ne noch de mane;
	god is selue dat licht scone.
	De conige vn(de) de heren
	brenget in de stat al ere.
	De porten staet open;
2545	se ne werdet nummer besloten.
	It ne wert dar nummer nacht;
	it is dar iummer clare dach.
	De stat is van dogheden wlle(n) vrome,
	dar ne mach nicht rechtes inne comen.
2550	Doe sente iohannes hadde ghesen desse w(u)nne,
	doe sach he vleten einen lutteren brunne
	In der wonlicher stat,
	al daer dat lamp uppe sat.
	An beiden haluen der vlot,
2555	stunt dat holt oc.
	Vrucht gaf dat also ghedane,
	de se at, he wart sorghen ane;
	Noch he ne mochte ghesteruen,
	noch he ne mochte verderuen.
2560	De bome waren clare;
	se gauen tuelf warue in deme iare.
	Er loef to aller stu(n)t
	wart dar manighe ghesunt. <2rb>
	In der stat solen se g[od]e sen,
2565	de nu to eme willet vlen
	Vnde sinen namen in den vorhouede draghet,
	dat si iv war ghesaghet.
	Desse betekenige is vrome:
	dat lamp is godes sone,
2570	De brunne is de dope vnde sun bloet;
	de holpe(n) vns beide vter noet.
	De bome de des plaghen,
	dat se gode vrucht gauen.
	Beteikenet dat heilige cruce dar got anstunt;
2575	he selue is de vrucht so goet.
	De ene nemet mit rechten sinne,
	de mach dat dar mede ghewinnen,
	Dat he nicht ne verwerdet
	noch des ewigen dodes steruet.
2580	In der stat is also grote wunne;
	were alle de werelt eine tunge,
	Se ne cundent nicht vorebringen:
	dar is su(n)der ende
	Got vnse here
2585	vnde vrowede iummer mere.
	De engel sprac do muenlike:
	dese wort sin war werlike.
	Du salt se scriuen openbare
	vnde doen se widemare.
2590	Got heuet di laten ghesen
	al de dinc de solen ghescen,
	Dat lieue vnde dat leide; <2va>
	ich sal nu van di [sc]heiden.
	Do wart bedrouet sere
2595	iohannes de here.
	He vel neder vnde wolde den engel anbededen <sic>;
	des ne wolde he eme nicht steden,
	He sprac: iohan leue man,
	ich ne dunke di nie so wol ghedaen,
2600	Du bist wol min ghenot
	vn(de) myn rechte hus ghenoet
	In der hemeleschen ierusalem;
	des sal ich di dur rechte ghen.
	Got is vnser beider here.
2605	de engel begonde denen keren
	Vnde vor to hemelrike an richte
	to iohannes ouchsichte.
	Vnde iohannes dede also eme de engel boet
	vnde screef apokalipsim dat boec.
2610	Dar an steit allet dat he hadde ghesen,
	dat in der werelde solde gheschen
	Bit an deme lesten stunden.
	got dur sine vyf wonde(n)
	Helpe vns to den besten
2615	vn(de) moet vns <über n: Nasalstrich zu erkennnen> so lange versten
	Hir in ertrike,
	dat wi verdinen dat hemelrike.
	Des gheunne vns got de hemelche vader.
	nu seget amen alle gader. Amen Amen.
	AMEN