| Text |
Wy Gotdert und Menolff, gebrodere van Brencken, zeligen Jurgen sonne, don kundt und bekennen vor uns, unse erven und erffnemmen in dissenm besegelden breve, dat wy van dem werdigen und erbaren hern Johan van Hoirde, domhern und senior der kerchen zu Paderborne entfangen hebben in eyner summen tho gantzem gnoge drehundert guthe golden gulden churfursten munthe by Rhyne, guyt van golde und gewerde, swar genoich van gewichte, und de selbigen golden gulden bruket thor inloisze der summen gulden, wy semptliche gebrodere van Brencken van der erbaren Catherinen Klencken witfruwen van Buren uffgebracht und geborget hatten, darvor wy dem sulvigen Johan von Hoirde, synen testamentern und heldere dusses breves myt synen off iren guten witten und willen verkofft hebben und noch iegenwordich in crafft dusses breves vorkopen eins rechten stedensten kopes und vorkopes viffteyn der selbigen guten rinschen golden gulden jarliche renthe und pension alle jair zu betzalen uff paischen dat hillige fest bynnen Paderborn sunder allen schaden, in uth und van unsern anteill der teynden, nemptlich den Kedynkhuser teynden, de jarlix geven kann dreundtwintich molt korns, uth dem Heigenstorper teynden, de geven kann jarlix sevenunddertich molt korns ungeferlich, und dem Mosbroeker teynden, de gifft ungeferlich jarlix negenund twintich molder kornes, also wie sodane teynden samet foret und gewynnete sullen uffgemelten hern Johan van Hoirde und synen medebeschrevenen sulcher jarlicher pension hanttedich sin und blyven, dewile dusse koep duret und waret, dergestalt, das de teynden, de sulche unse teynden gewunnen haben und foren, sullen voraff de pension vorgerort betalen. Und so vyll darvon inbeholden, se wal betalen konnen, indeme wy sulvest de teynden nicht foren laten, laten wy se aver foren, so willen wy se auch sulvest betalen sunder all infall, wedderrhede und schaden. Und willen daran sin, dat neyne versumnisse an der betalinge geschein sall, hebben darumb dem hern koper gesat und noch jegenwerdich setten in hebbende brukende were und besith sulcher viffteyn golden gulden pension, willen und sallen der sulvigen sampt der hovetsumme here und warent sin gnochsam fullenkomen wairschop doin der hovetsumme und pension uth allen unsen andern gutern, wair wy de hebben eder noch krygen mogen, und sunst so vaken des noit und van uns schrifftlich eder muntlich gefordert wert und up dat dusse betalinge der pension gewisz geschein sulle ane jenigen mangel, so hebben wy tho witerer verwaunge vorgnt. hern Johan van Hoirde waerborgen und medesakewolden gestalt und gesath, als nemptlich de erentfesten und erbaren Christopher van Hoirde, unsern steffvader, Joiste und Jurgen van Brenken unseren leven broder und fettern, de vor uns gelovet und mede sulffschuldige sake wolden gelich uns geworden sin, dergestalt und also, wanner dem hern koper und synen medebeschrevenen jenich mangel geschege an der betalinge eder doch derhalven schaden neme, dasz alsdan in deme fall de kopere mogen de selbigen dre personen eisschen und fortern schrifftlich eder muntlich in eyne gemeyne herberghe bynnen Paderborn eder Geiseke nach der kopere gefallen, dar se dan bi iren rittereren inholden und inriden wollen und sullen mit twen perden itlich und mit eyn knechte ....lesten darsulvest in und dar nicht wedder uthgeyn, solange sulch schade und mangel an der betalinge sy davor erst deger und all wal betalet und entrichtet. Welcher wy Christopher van Hoirde, Joist und Jurgen van Brencken gefetteren umme bede willen beider Gotterdt und Menolff van Brencken gebrodere also angenommen uns vor rechte wairborgen und fulschuldige prinzipail sakewolden mede gestalt hebben, loven und sakewolde werden und geworden sin, vor allen schaden und mysbetalinge, und so de noit forderde uff inforderunge und ineisschunge inleisten willen und aller mathe wie vorgerort, dat wy so loven und holden willen by unseren rittereren als fromme lude vor uns, unse erven und ein vor all, so des noit wurde eder nach des hern gefallen umme de pension und schaden, so schaden geschein und enstandt wer fordern mit rechte beide geistlich und wertlich, wo dem heren kopere eder synen medebeschreven best gelegen und gelustet, beheltlich doch uns verkoperen und unsern erven eyner wedderlosze, dat wy alle jair und unvorjaret sodan vifftein golden gulden pension mogen wedder inloisen in der hilligen paischewecken bynnen Paderborne mit drenhundert guten swaren rinschen golden gulden als bovengerort in eyner summen frig ledich und loisz tho leveren, indeme alle erschenen pension in den tyden und allen vergangen terminen deger und all mit allern kuntlichen schaden wal betalet und de wedderloise tuschen sunt Michael und Martyn hilligen tagen witlich bevorn verkundiget sy. Alle puncte und artikele vorgerort sampt und besundern loven wy verkopere vor uns, unse erven und anerven stede vast erlich by rittergeloven tho holden sunder jenich insage und behelp beide geistliches eder wertliches rechten. Unde hirmede auch vortyggen allen privilegien verfolgunge landesgebrugh und frigheit dusses landes und alles behelpes wy tegen dussen verkoip und koiff vorwenden und gebruken mochten sunder argelist und geferde. Des allet in orkunde der warheit hebbe ich Gottert van Brencken myn ingesegel vor my und mynen broder Menolff als de itzunt nicht bynnen landes is, dar ich vorstaen und antworden wyll unse erven und anerven vestlich an dussen breiff doen hangen. Und wy borgen und medesakewolden vorbenompt hebben auch unse ingesegele ein nach dem andern an dussen breiff vor uns und unse erven mede don hangen, des wy also bekennen. Und went disse gutere vorgerort leynguthere sin eyns domprovest tho Paderborne, so hebben wy vorkopere gebeden den erwerdigen und erentfesten hern Wilhelm Westphaell domproveste der kerchen tho Paderborne und proveste tom Bustorp, dat sin werde dussen koep und verkoep belevet, bewilliget und thogelaten, als de rechte leynherr. Und des in orkunde sin ingesegel an dussen breiff hefft bevorn doen anhangen. Des ich Wilhelm Westphael domprovest vorgerort also bekenne und gedaen hebbe umme bede der verkopere vorgerort. Gescheyn und verhandelt im jare dusentviffhundert und vifftich am montaghe nach dem sontage Iudica in der vasten. - (alle 5 Siegel an) |
Suche DWUD 
früher
|
später
Erpernburg 
zurück
