| Titel/Regest |
Die Schiedsrichter Philipp v Twiste, Godderd v. Meschede, Herbold v. Oeynhausen, Gerd Spiegel und Wilhelm Krevet vergleichen die Brüder und Vettern v. Brenken: Friedrich, Cord, Jörg, Wilhelm und Reyneke. Vergleichspunkte: Schuldverschreibung der Volmer, Olrik und Rauen v. Brenken über 7 mold. Korn, "huysinge bynnen Brenken", Schaftrift, Samtmühle, Koelhof, "den nu tor tyt Quast underhefft vor dem oueren dore gelegen", hof up der breden, Neubau "vor demm Wynckenberge up der Erberenn breden", das Vorwerk dabei, das Eichengehölz, die noch ungeteilten Äcker, Geseker, Mark, Schweinemast, Verfahren gegen Leute im Banne, denen der Richter das feuer auszugießen hat. |
| Text |
Et is bededinget dorch uns fulmechtigenn gekorenen scheidesfrunde, nementlich de werdigen und erberen heren Philips van Twyste, domhere tho Paderborn, Goderde van Messchede, Herbolde van Oyenhuysen, Gerde Speigell und Wylhelme Crevete, twysschen den erentfesten und erberen Fredrike, Corde, Jorgen, Wylhelm und Reyneken, alle van Brencken, broder und vedderen, eyn gruntlich ewich und unwedderroiplich vordracht und scheeth, so hyrna folget: Tom ersten so Cort und Reyneke van Brencken antheet van eynen breve, de van Volmar, Olriche und Raven van Brencken sall vorschreven spreckende up seven molder korns und de sollen uthe erem gude alleyne vertynset syn, darup seigget Frederich, Jorgen und Wilhelm van Brencken im samptkasten sy eyn breiff, de solle den wech wyszen darup; so dat aver nicht were, sollen se Corde und Reyneken wedderstadinge doin. Eth is bededinget myt der huysinge bynnen Brencken, dar Wylhelm van Brencken inne wonneth, sal me Corde und Reyneken dat dar vorgewyset ist nu vort meer mede beteinen laten, unde wes Frederich, Jorgen und Wylhelm van den mennen daruppe wonnen gebort hebben wyll Cort und Reyneke eren vedderen tho wyllen schencken. Umme de schapedriffte tho Brencken ist besprocken, dat Jorgen und Wylhelm van Brencken ere scheperige se itzundt hebben beholden. Aver wat schape se in gewynste hebben und ouck erer knechte schape, dar sollen se den tegeden van geven gelick de schepere in dem dorpe. Wert ouck dat Cort und Reyneke van Brencken edder ere erven dessyns worden bynnen Brencken edder dar buthen tho buwende und scheperye to holden, sollen de anderen sunder insage vergunnen und gelickmetich geweren laten sunder argelist. Ouck ist besprocken, dat de van Brencken sollen und wyllen semptlichen eyne mollen buwen, dar eth enne aldernuttest sy unde de semptlichen uthdoin umme de pacht eynen idermann tho synem anteill. Ouck sall Cort und Reyneke van Brencken den Koelhoff nu tor tydt Qwast underhefft vor dem overen dore gelegen so groit maken alse de koelhoff up der Breden gewest is, den Wylhelm van Brencken underhefft unde en erme wedderstadinge vor den hoff up der Breden beholden. Hedde ouck we gudere tho sick geloist, de van uns van Brencken semptlich vorschreven synt, wen de anderen der vorschrivinge copien beghert, salme en geven, up dat eyn idermann na vormeldinge der panneschp toin synen komen moge. So ouck Jorgen van Brencken gebuwet hefft vor dem Wynckenberge up der Erberen Breden, so is de sulffte plass, dar dat huyss unde backhuyss uppe stain, Jorgen in syner deylinge des landes thogefallen sunder dar dat vorwerck unde ander stallinge tom qwicke uppe steit is samptgudt aller van Brencken, dar wyll und sall Jorgen synen vedderen gelick groit ackers en belegen wedder vor geven. Eth is ouck vorder besprocken, dat neymant sall dat eckenholt verderfflyken afftwiggen, sunder wat malck tho synem gebuwe behovet. So ouck erdom was umme eynen eygen man genant Johann Pollock de aller van Brencken eygen syn solde, hefft Cort und Reyneke van Brencken eren deyl Wylhelme overgegeven umme alles besten wyllen, dat Wylhelm den genanten Johann vor syn eygen beholden sall; darvor hefft Wylhelm van Brencken Frederike und Jorgen van Brencken gegeven des Mengers sonne tho Haren genant (Lücke), dat de Frederike, Jorgens und Wylhelms semptlyken syn sall. Vorder is bededinget, so godt mast geve in der van Brencken holteren, dat se dan er knechte und vogede up de holter senden sollen und beseen, wo vele swyne dat me darup uithmaken kunde und driven de darup unde wen de uith synt, wat dan der van Brencken eyn darsulvest mede hefft, dar sollen de anderen, de dar neyne hebben, so vele tegen nemmen, dat eyn itlick tho synen antell der mast lyke wol geneten. Ouck is bededinget, dat se dorch ere vogede und knechte alle ungedeylde eckere vorder fruntlyken deylen sollen, und hedde we wes tho velle, dat rede in der deylinge were, sal me lyke metten, dat de eyne so velle als de ander na synen antell hebbe. Ouck is besprocken, dat wy van Brencken sulvest nicht willen edder ouck nemande vorgunnen in der Gesiker marke tho hodende myt schapen, koyen, perden effte szeegen, unde wat nuttes van dem holte der sulfften marcke kommet, sall gaen den wech na lude der vordracht darover hyr bevorne upgerichtet. Ouck is wyder beredet, wert sake dat jenich mann tho Brencken, he sy fryg effte eygen, sick bannen leith boven eynen mant tydes, dem sall de richter dat fuer uthgeyten, unde wo de de sulffte eyn fuer wedder mackede, er he uth dem banne is, de sall uns van Brencken semptlyken tho itlykem male myt eyner marck vorvallen syn, de men ouck sunder nalaten vorderen sall und eynem ideren tho synem antell geven. Ouck is vordedinget, dat erer neyner sall dem anderen syne verledede und bebrodede huysgesinde uth synem denste meden, eth en gesche dan myt willen. Wert ouck sake, dat in vorder jenich erringe twischen den van Brencken entstunde, so sollen se unvortochlyk in eynem mandt tydes dusse nageschrevenen ere gekorenen scheidesfrunde vorderen und up eyne gelethlike stede unde tydt to kommende bydden als nemptlich Frederich van Brencken tho behoiff syner und syner erven Gerdes Speigel, Cord van Brencken tho behoiff syner und syner erven Gorde van Messchede, unde Jorgen van Brencken tho syner und syner erven behoiff Herbolde van Oyenhusen, Wylhelm van Brencken tho syner und syner erven behoiff hern Philips van Twiste, domhern, Reyneke van Brencken tho behoiff syner und syner erven Wylhelm Creveth, unde dussen sulfften macht geven, se in fruntschop edder rechte tho entschedende. Wert ouck dat eyn tegen des anderen menne jenige sprake gewinne vrede were, sall den mann myt rechte vorderen. Wert ouck dusser frunde eyn in godt vorstorve, solden se macht hebben, eynen anderen in des vorstorven stede tho kesen. Ouck sall erer eyn keyn tegen den anderen gewalt gebruken, darmede dusse fruntlyke vordracht in jenigen artikell gekrencket werde, we dar unhorsam ane worde, de sall tho allen tyden, so vaken dat geschege, dem gehorsam parthe in hundert goltgulden pene gefallen syn, de he ouck sunder qwydtgeven betalen sall. Alle dusse puncte und artikel in dusser vordracht begreppen dorch unse gemelten scheidesfrunde upgericht love wy Frederick, Cort, Jorgen, Wylhelm und Reyneke brodere und vedderen van Brencken vor uns und alle unse rechten erven by unser ere und eyden eyn dem anderen unvorbrocklyken sunder jenigerleye argelist stede und vast geholden. Ouck sall keyner unser erven tho dem dorpe tho Brencken myt syner thobehoringe nicht kommen, se sollen thovorne in aller mathe dussen contract und vordrach loven unde sweren in alle synen articulen tho holden, gelick wy gedain hebben. In eyn teken merer seckerheyt und ewiger bekantnisse hebbe wy Frederich, Cort, Jorgen, Wylhelm und Reyneke brodere unde vedderen van Brencken unse eygen ingesegele vor uns unde alle unse rechten erven vestlyken an dussen breiff gehangen. Hebben ouck gebeden unse fulmechtigen bovengeschrevenen dedingeslude se dussen breiff myt uns besegelt hebben. Des wy bovengemelten dedingeslude so bekennen und umme bede wyllen der van Brencken gerne gedain hebben unde unse ingesegele vestlichen an dussen breiff eyn na dem anderen gehangen. Im jare unses heren do me schreiff dusent vyffhundert dar na in dem veerundtwintigesten jare an myddewecken na unser leven fruwen dage lechtmyssen. |
Suche DWUD 
früher
|
später
Erpernburg 
zurück
