Titel/Regest |
Wysset hoichgeborn forste her Johan Hertzoge zu Cleve [Kleve] und grave zu der Marghe [Mark], so alse ir mit dem hochgeborn forsten hern Adolffe, hertzogen zu Geller [Geldern] und von Gullich [Jülich], grave zu Sutpehen [Zutphen], myne gnedigen lyben hern zu feheden gekomen sint, daz ich, Ebert van Seyn [Sayn], junge grave zu Wydechenstenn [Wittgenstein], ummb des egnt. myns gnedigen lyeben hern wiln uger feynt syn wil, uger, uger lande, luede und undersaszaszen [!], mit mynen helffern, knechten und myderydern und alle, dii ich uff ugern schaden gebreugen kan, und wers, daz ir eder dye ugern sollichir myner fehede eynichen schaden nempt, wy sich der schade mechte eder zu qweme nicht dar van uszgescheiden, des wil ich myn ere an uch vorwart han und wil uch eder den ugern eder nymandes von ugern weigen dar vor zu antwerden und bedorfften wir eynicher vorwarunge me, dye wolde ich alle hir myde gedan han und zihen mich des in des egnt. myns gnedigen hern freden und unfrede in orkonde myns sigelle. Datum anno domini M CCCC LXVI uff den nesten dynstdag vor sinte Walper dage etc. |