Text |
Honorius episcopus servus servorum Dei dilectis filiis magistro et fratribus ordinis Predicatorum salutem et apostolicam benedictionem. Religionis favor, sub qua virtutum Domino deservitis, et fructus uberes, qui ex vestris laboribus in ecclesia universali divina gratia cooperante proveniunt, nos inducunt, ut illa vobis favorabiliter concedamus, per que ab impedimentorum obstaculis liberati fructificare liberius in eadem ecclesia valeatis. Sane ex parte vestra fuit propositum coram nobis, quod nonnulli priores et fratres vestri ordinis in receptionibus domorum et locorum eiusdem ordinis cum prelatis, rectoribus et clericis ecclesiarum, in quarum territorio domus et loca predicta consistunt, sine tua, fili magister, et alicuius predecessorum tuorum ac generalis capituli ordinis predicti licentia et assensu compositiones et pacta varia in preiudicium indulgentiarum et privilegiorum apostolice sedis eidem ordini concessorum inire temere presumpserunt, cum id eis nec ex administratione competeret nec ex speciali esset concessione commissum nec a te tuisve predecessoribus, prefate magister, vel ab eodem capitulo fuerunt compositiones et pacta huiusmodi acceptata. Quare nobis humiliter supplicastis, ut, cum ex conventionibus et pactis eisdem presumptis taliter in hiis, que ordini prefato tam ex apostolice sedis privilegiis ac indulgentiis quam a iure communi concessa esse noscuntur, nimium derogetur, providere super hoc paterna sollicitudine curaremus. Nos itaque volentes super hoc de benignitate apostolica providere presentium auctoritate decernimus, quod ex compositionibus et pactis talibus et taliter initis in hiis, que ipsi ordini vel personis aut locis eiusdem sive de iure communi competant sive per privilegia vel indulgentias sint concessa, eisdem ordini locis, domibus vel personis preiudicium nullum fiat, sed compositionibus et pactis ipsis, dummodo nec a te, memorate magister, nec a predecessorum tuorum aliquo vel dicto capitulo acceptata fuerint, nequaquam obstantibus tam ipsis ordini domibus, personis et locis quam hiis, cum quibus eadem compositiones et pacta sunt inita, ius pristinum absque alicuius impedimenti obice integrum conservetur. Nulli ergo omnino hominum liceat hanc paginam nostre constitutionis infringere vel ei ausu temerario contraire. Si quis autem hoc attemptare presumpserit, indignationem omnipotentis Dei et beatorum Petri et Pauli apostolorum eius se noverit incursurum. Datum Rome apud sanctam Sabinam XIIII kalendas Februarii, pontificatus nostri anno primo. |