| Titel/Regest |
Die Eheleute Johann von Blankenstein (Blanxstein) und Stine tom Putte sowie ihre Kinder Wennemar, Katharina, Hille (Hilken), Else (Elseken) und Gertrud (Gertken) veräußern als Erbkauf (erffkopes) an Karde Darboven eine Jahresrente von achteinhalb Malter Korn, die je zur Hälfte aus Roggen und Gerste nach Bochumer Maß besteht. Die Kornrente wird jährlich am S. Martinstag von der Willekenshufe (willkenss hove) zu Altenbochum ausgegeben. Für den Preis von 75 Rheinischen Gulden wird den Ausstellern ein Wiederkaufsrecht für die Rente eingeräumt, das sie jährlich an St. Petri Stuhlfeier (22.02.) in Anspruch nehmen können. Der Bürgermeister und der Rat der Stadt Bochum garantieren den Vollzug des Rechtsgeschäftes und kündigen ihr gemeinsames Siegel an. |
| Text |
Wy, Johan van Blanxstein, Styne sin echte huissvrouwe, Wenemair, Katheryne, Hilken, Elseken ind Gerdeken, Johaniss ind Stynen echte kindere doin kunt ind erkennen in desem breyve vur onss ind onse erven, dat wy eyndrechtlichen myt onsem guden vryen willen umb ene summe geldes, dey onss to onsem willen ind genoige deger ind all waill betalt is, vurkofft ind verkoepet rechtliche ond redeliche stedes vastes erffkopes ten ewigen daigen Karden dar Boven, eren erven off dem helder dys breyves myt eren willen achtehalff malder gudes harden claren schult karenss halff rogge ind halff gerste bokemscher maten to heven ind to boren jairlix ind alle jare upp senti Martyns dage komende in dem wintere byt der Wilkenss hove gelegen to Aldenboichem ind byt den hoeven alingen tobehoringen ind rechte, ind vort byt anderem onsem semelichen erve ind guede, dat wy nu hebn off hyr noe krygen moegen, wellich vurscreven korn wy ind onse erven der vurscreven Karden eren erven off helder vurscreven jairlix ind alle jare upp dey vurscreven tydt sollen ind willen antwerden, leveren ind waill betalen to Boichom bynnen in erffren secker wysse behalt upp onss selves cost angest ind all eventure, so dat en des waill genoege. Wer sake, dat wy off onse erven des nicht endeden, so woe dat to queme, so moegen sey itlix jairs nemen enen vronen onverclaget ind onvervolget an dem gerichte ind penden dese vurscreven jairlix gulde byt dem vurscreven gude ind vort byt onseme semelichen erve ind guede, dat wy nu hebn off hyr noe krygen moegen, as mere rechte jairlix gulde pleget to penden ind to manen ind vort so solle wy off onse erven der vurscreven Karden eren erven off helder vurscreven deser vurscreven karn gulde byt dem vurscreven gude waren ind rechte wulle warschopp doin as boven ind neden in den landen gewoirde ind recht pleget to sin sunder onderscher winte so lange, dat wy off onse erven dey vurscreven karn gulde weder gekofft hebn myt vyff ind seventich guder sware overlendescher rinscher gulden welken wederkoepp wy doin moegen jairlix ind alle jaire upp senti Peters dage ad cathedram acht dage vur off acht dage nae der vurscreven Karden in er secker vry wysse behalt ein ener alinger summen to vernoegen ind waill to betalen sso dat, er off eren erven off helder vurscreven dat waill genoege dese vurscreven punte ind eyn itlich bysonder love wy verkopere vurscreven vur onss ind onse erven in guden truwen ind in ede stadt wair stede ind vest to hailden sunder argelyst. Ind wy, Johan, Styne eluide, Wennemair, Hilken, Elseken ind Gerdeken vurscreven sint vort gekomen vuir dey eirsamen borgermerster ind rait to Boichem in der tydt ind sin deser vurscreven karn gulde alinck ind alldoger byt gegain ind hebn dan van rechte uplatinge ind vertichnise vur onss ind onse erven also, dat wy ind onse erven dar van sollen sin entervet ind dey vurscreven Karde ere erven off helder vurscreven sollen dar mede sin geervet ten ewigen daigen ind hebn vort gebeden dey vurscreven borgermerstere ind rait desen breyff vur onss to besegelen. Des wy, borgermestere ind rait vurscreven, enkennen, dat wy dat umb deser vurscreven bede willen gerne gedan hebn. Gegeven in den jaren onss heren dusent veyrhundert eyn ind sestich upp senti Pauwells conversio. |
Suche DWUD 
früher
|
später
Marienborn, Kloster 
zurück
