Text |
Ek Herman van Bracle, rytter, bekenne in dessem breve openbare und betuge, dat ek myd vulborde Katherynen, miner eliken vrowen, Alberte van Bracle, myns vedderen, und alle miner rechten erven guden wyllen hebbe vor koft eynen rechten koipp und verkope in dessir scrift mynen hoff gelegen to Tytletssen, den nu to tyden buwet die lange Tolleken, myd alle syner to behoringen, wore die dar gelegen zind in holte, in velde, in wesen, in weyden, gefruchtiget edyr ungefruchtiget, unde myt alme rechte, wo dat den namen eghet, vor sesteyn mark Wartberscher penninge, de my wol betalet zind, der bescheden vrowen Conegunde, ichtezwanne echten vrowen Cord Alvesschun, dem Got gnedych zii, oren rechten erven und holdere desses breves und sette sie van staden an in de vullencomen were des hoves to Tytletssen vorscreven, meygere dar up to settende edyr entsettende na al orme wyllen, und dez hoves en rechte warscap don, wore und wanne en des nod ist. Doch so magh ek Herman van Bracle, rytter vornompt, edyr myne rechten erven und scolen den egenompten hoff to Tytletssen umme sesteyn mark Wartberscher penninge van Conegunde Alvessen, van oren rechten erven edir holdere desses breves, also vorscreven ist, alle jar upp Wynachten wedirkopen, des wy on odir sie uns den wederkoipp to sunthe Mychahelis dage allernest dar bevorn kuntliken vor verkundeghen. Alle desse egenompten stucke love ek Herman van Bracle, rytter vorscreven, an guden truwen vor mek und alle myne rechten erven stede und vast to holdende ane argelist. Und des to tuge hebbe ek myn ingesegel laten gehangen an dessen breff. Vortmer ek Albracht van Bracle, knape, bekenne oick in desser scrift openbar und betuge, dat ek myn vulbord hebbe gheven to dem kope in allir wise vornompt und love den an goden truwen vor mek und myne erven stede unde unverbroken to holdende unde dez to tuge hebbe ek myn ingesegel laten gehangen an dessen breff. Datum Dyonisii et sociorum eius anno Domini millesimo CCC° octogesimo primo. |