|
Regest |
Datum |
1327-02-17 Suche DWUD Suche Portal |
Datum Bestand: früher
|
später
|
(des dincsedages na zunte Valentines dage des mertelers)
|
Titel/Regest |
Wi Bernhard [V. zur Lippe] van godes chenade byscop to Paderborne [Paderborn] bekennet unde betuget in dessen yegenwordigen breve, dat en zone ghedegedinget is tvischen uns af en zyth unde den borgheren unde der stad van Paderborne af ander zyth vor midden unser beyder vrunde umme allerlege schelunghe unde stucke, de tvischen uns nu werende zyn. De zone hebbe wi mit rade unde mit willen unde mit ganzer vulbord des domprovestes, des domdekenes unde unses gemeynen kapeteles van Paderborne gheannamet, stede unde vast to holdene, also alse hyrna beschreven is. To deme ersten umme de ghemeynen tovore unde afvore unde dryft der weyde, de wi en vorboden hadden, de enzole wi oder unse nakomelinghe en nygt mer vorbeden, men de zolen ze hebben, alse ze oldinghes de hadden, et en zy, dat wi ere viyent zyn unde openbare entzeghet hebben. Vortmer umme dat veld vor der Westerenporten [Westerntor], dar de keremisse pleghet uppe to wesende. Dat veld unde de keremisse zolen also ledig unde vry wesen unde bliven, also ze van oldinches ghewesen hebbet. Vortmer hir enboven zal allerlege andere schuld, de wi den borgheren unde der stad van Paderborne gaven zamentliken oder zunderliken, de wente an dessen dach gheschen is, bestreken unde gensliken vorzonet wesen, also dat wi oder unse nakomelinge, de borghere unde de stad van Paderborne stilliken oft openbare dar umme nunmermer schuldigen nezolen. In eyn getugh unde vesteninghe alle desser vorsprokene rede hebbe wi dessen jegenwordigen breef mit unseme unde unses vorgenomtes kapeteles inghezegelen bezeghelet [!] laten. Unde wi de vorgenomte domprovest unde domdeken unde dat ghemeyne kapetel van Paderborne in eyn ghetugh unses willen unde vulbord alle desser vornomten rede hebbe wi unse inghezegel in dessen jeghenwordighen bref ghehangen laten. Dit is gheschen unde desse bref is ghegheven na godes bort, also men schrivet dusentdrehundert unde zevent unde tvyntigh jar, des dincsedages na zunte Valentines dage des merteleres. |
Archiv |
Verein für Geschichte und Altertumskunde Westfalens, Abteilung Paderborn e. V. |
Bestand |
Urkunden | alle Regesten |
Benutzungsort |
Erzbischöfliche Akademische Bibliothek Paderborn |
Quelle |
Stöwer, Ulrike (Bearb.) | Das Archiv des Vereins für Geschichte und Altertumskunde Westfalens, Abteilung Paderborn e.V. | Nr. 076, S. 69f. |
Formalbeschreibung |
Ausf., Perg., Nd. - 2 anh. Siegel: 1) Bernhard, Bischof von Paderborn, (zerbrochen, Umschrift tw. verl.), 2) Domkapitel, (Umschrift tw. verl.), mit Rücksiegel - Rückseite: Privilegium Bernhardi de hoide [...]dryfte und frigmarck[e]t bedreffende [16. Jh.]/ Vergleich zwischen I. F. G. einem hochlöblichen Thomkapitel und der Stadt Paderborn, Datum 1327, der Ab- und Zufuer und die Kermeß vorm Westernthor betrefendt [17. Jh.]/ N. 67 Litt C [korrigiert] [17. Jh.]
Regest: Stolte S. 149f. |
Projekt |
Digitale Westfälische Urkunden-Datenbank (DWUD) |
Systematik |
|
Datum Aufnahme |
2003-12-27 |
Aufrufe gesamt |
2869 |
Aufrufe im Monat |
68 |