| Text |
Wi Reynold bi der godes genaden hertoghe van Ghelre ende greve van Zutphen doen cont allen luden, die desen brief sein ende horen lesen, dat wi doer gades wille ende um aude gonsten, die onse anderen hebben ghehadt tot den heren van sente Jans orden, ende sonderlinghen, die in onsen lande gheseten syn ende die haer goet onder ons gheleghen is, alse den commenduren van Utrecht, van Arnhem, van Nymeghen, van Inghen ende van Buren, alle haere broderen, haer lyf ende haer goet, so waert gheleghen is in onsen hertochdom ende grevescap, ghenomen hebben ende nemen volcomeliken in onse sonderliken beschermnisse ende speciale hoede ende willen, dat si des vriliken ende rasteliken ghebruken, onghemoyet van yemant. Voert weert sake, dat yemant op die heren, die wi in gheenre manieren veronrecht hebben en willen, te seghghen of te spreken hedde, dat si des voer en ghenen onsen richter te rechte en staen en soelen dan voer ons, want wi des selve een richter wesen willen of die ghene, dient wi bevelen. Waer um wi ghebiden vesteliken allen onsen richteren ende amptluden van onsen lande, dat si die voergen(omten) commenduren, haer broderen ende haer lyf ende goet voerscr(even) beschermen, behoeden ende bewaren in onsen lande van onser weghen van allen onrecht ende niet enstaden, dat hem yemant in engherhande manieren onghelike voer legghe, want wi des niet en willen, maer haer ere ende haere beste in allen saken ghevordert hebben. In orconde des ende bekeennisse der waerheit so hebbe wi onse heemelike segel hier aen doen hanghen. Ghege(ven) tot Brusel des twintichsten daghes in den Meye int jaer ons heren dusent driehondert ende viertich. |
Suche DWUD 
früher
|
später
Hinnenburg 
zurück
