| Text |
Ick, Gorgen van Brencken, knape, Ravens van Brencken, dem godt gnade, sonne, bekenne und bethuge oppenbaire in und myt dussem oppenen besegelden breve vor my, alle myne rechten erven und sunderlinges myt willen und gantzem vulbort Fredericks van Brencken, myns broders, dat ick hebbe verkofft und vermytz dussem breve verkope eynes steden, vasten, erfflyken verkopes eyn molt gudt marcktgeve korns Gesyker mathe dryerleye alze roggen, gersten und haveren, eyns juweliken gelyke vele, uthe mynen teynden tho Heygenstrop dem erszamen Coirde van Hagen, borgher tho Gesyke, Eliken, syner echten husfrowe, eren rechten erven offt dem holdere dusses breves myt eren ghuden willen vor eyne summen geldes, de my tho willen deger und all wall betailt ys und kuntlyken in mynen nut gekommen und gekairt. De vorgnt. kornegulde alle jair up sunte Michaels dach des hilgen ersengels unbesat und unbekummert alles rechten bynnen Gesyke tho betalen. Vortmer love ick Gorgen obgemelt wu vorgescreven dem genanten kopere und synen medbenompten dusser geroirten kornegulde rechte gude vullenkommen wairschop und jairlix betalinge tho doinde vor allerhande ansprake geistlyken offt wertlyken rechten, wanner, war und wuvaken dem kopere eder synen medbescrevenen des noit offt behoiff doit, sunder wedersprake tho erfflykem rechte fredelyken und restlyken tho besittende. Ock wert sake, dat sodane korngulde up tydt vorgnt. nicht betailt worde, so will und sall ick Gorgen obgemelt, wan ick darumme gemanet worde, tho Gesyke inryden myt eynen knechte und twen reysigen perden in eyne gemeyne herberge und dar nicht uththen sy myt des gnt. Coirdes eder syner medebescrevenen guden willen. Dit wu obgescreven love ick Gorgen mergenant den genanten koperen stede, vaste, unverbrocklick wall in edestat by myner ere tho holden sunder alle argelist und geverde. Myt dusser gnade umb godt und walldait weder in dussem selven breve gegeven, dat ick offt myne erven alle jair und unverkairt dusse vorbenompten korngulde mogen van dem vorgnt. kopere, synen erven offt dem holdere dusses breves alze vorgeroirt ys wederkopen vor dertich gude overlendescher Rinscher golden gulden gudt van golde, recht van munte, swair gnoich van gewichte, twischen sunte Mertyns und Peters hilgen dagen, als he up den stoill qwam, des de versetten pensye thovorne tho allen tyden wall vernoicht und betailt sy. Dusses tho thuge der wairheit hebbe ick Gorgen vorbenompt myn ingesegell vor my und myne rechten erven an dussen breiff gehangen. Ock so bekenne ick, Frederick van Brenken ergenant, dat sodaner verkop myt mynen guden willen und vulbort geschein ys. Und dessen thor kuntschop myn ingesegell mede an dussen breiff gehangen. Noch vorder hebbe ick, Gorgen obgemelt, gebeden den gestrengen Bernde, olden heren tho Buren als eynen vormunder der nagelatenen kynder myns broders Philips, dem godt gnade, he syn ingesegel van der vormunderschop wegen ock mede an dussen breiff hevet gehangen. Des ick, Bernt olde here tho Buren so bekenne und umb Gorgens obgnt. Und Claren nagelaten wedve zeligen Philips van Brenken gedain hebbe. Dedingeslude hir over und an gewest de bescheiden Johan van Synchusen, Hinric Fleischouwer, borgers tho Gesyke, und ander guder lude gnoich. Datum anno domini vyffteynhundert und vyff jaire am saterstage negest nach sunte Urbains dage. - (alle 3 Siegel ab) |
Suche DWUD 
früher
|
später
Erpernburg 
zurück
