| Text |
Wy, Erick, van gots gnaden byschop to Osenbrugge und Paderborne, hertoghe to Brunszwick, doin kunt und bekennen in dussem apenen breve vor uns, unse nachkomen und stifft Paderborne, szo und als wy itzunt unsen leven getruwen allen van Brencken de loyse gekundiget hebben laten up unser und unses stifftes Paderborne slott de Wevelsborch, szo hefft der erbar unse leve getruwe Jurgen van Brencken uns als synen lantfursten ersucht und underdaniglich gebetten, wy alsz der lantfurste ime willen günnen und erloven, eyne nyge husinge und vesteninge up synem egen grunde und boden und doch in genantem unserm stiffte belegen, moge bouwen. Nach dan genanter Jurgen uns und genantem unserm stiffte vell willens und denste gedain hefft und noch doin mach, ock dusse bede nicht untemelik, so vor erloven und consentieren wy ergenanter furste vor uns, unse nachkomen und stifft genantem Jurgen und synen erven in und mit krafft dusses breves, sulche husinge und vesteninge to bouwen up dat everste Erppers dresch, belegen beneden Brencken vor dem Weynckenberge, sulch thofestigen mit graven und wellen tho schudden, nach syner und syner erven notturfft. Dusses tho orkunde und steder holdunge hebben wy ergent. Furste unse ingesegel beneden an dussen breff doin hangen. Datum Nygenhuse anno domini millesimoquingentesimotertiodecimo saterdages in den hilligen pinxsten. - (Siegel an) |
Suche DWUD 
früher
|
später
Erpernburg 
zurück
