| Titel/Regest |
Ich, Sander Droste do kundt, als de erwerdige hogeborene forste myn gnedige leue here van Munster my den hoff to Emethe, dat Nettelenbrock, dat huß to Emethe genant Slychtinck, dat Dyckhus, das Letterhus, dat Broxtehus, Vlckemans Erve, dat Abts guet myt den luden vn all den olden vn nyen tobehorigen erffliges ewiges copes vorkofft vn eynen wederkopes breff, dat myt sesshundert goldener Rinscher gulden to mogen weder copen, van my entfangen hevet, vn dar nest vmb zake willen dem erberen heren Gossen van Raesfelde, ritter, hevet gegunt, he dat myt sulcher summen gulden van my to sich copen, mach, so bekenne ick vor my vn myne Erven, dat de selue her Gossen my no de vurscreven seßhundert golden Rinsche gulden in reeden getalden gulden auerelevert vn wall betalt hevet vnd dar mede myt willen myns gnedigen leuen heren vurg. Emethe myt den luden vnd guderen darin vnd tohorende weder van my vn mynen erven to sick vn synen erven gekofft heuet. Schelde darvmb vor my vn myne Erven enne vn syne Erven van den seluen sehshundert gulden quyt, ledich vn loehs vn bedancke en der guder betalinge vnde dehs in orkunde heb ick, Sander vurs., myn segel vor my vn myne Erven an dessen breff gehangen. Gegeuen in den Jare vns Heren M°CCC°primo vp sunte Wilbrodi dage. |
Suche DWUD 
früher
|
später
Lembeck 
zurück
